Daos d'alta hospitalaria los tripulantes del pesqueru fundíu en Navia

Los marineros tán anímicamente bien

Los tripulantes rescataos ayer d'un pesqueru gallegu fundíu a unes 50 milles al norte de la costa de Navia (Asturies), y que fueron treslladaos a centros hospitalarios del Principáu, fueron daos güei d'alta.

Según informaron fontes de la Conseyería de Sanidá del Principáu, tanto los cinco marineros que fueron ingresaos nel centru hospitalariu de Xove como los otros dos, nel Hospital de Cabueñes, recibieron esta mañana l'alta hospitalaria.

Estos siete trabayadores con otros cinco compañeros fueron rescataos ayeri por Salvamentu Marítimu cuando yá taben en balses salvavides, a les que pudieron acceder cuando'l pesqueru, denomáu Gure Uxua y con base nel puertu gallegu de Cariño (A Coruña), entamó a fundir.

El buque, de 24 metros d'eslora y dedicáu a la pesca de merluza, terminó de fundir a 50 milles al norte de la costa asturiana poco dempués de que la tripulación diere l'alerta sobre les 15:20 hores, nuna xornada na que'l mar Cantábricu lleva díes n'alerta por fuertes foles y vientu.

Los tripulantes residen en Cariño y son los más d'ellos gallegos, anque ente ellos tamién hai dalgún portugués.


El patrón de la embarcación relató a la so salida del hospital que'l rescate foi rápidu y que toos s'alcuentren bien.