El montañeru muertu yera un veteranu que cayó na baxada

Sorpresa ente quien conocía a Ramón Riera, pola so amplia esperiencia nel monte

Un montañeru xixonés de 66 años morrió ayeri al cayer al ríu Seya, mientres facía una ruta pel escobiu de Los Beyos. El fatal accidente tuvo llugar nuna fastera mui vertical en Ponga, ente la ponte Berganza y la ponte La Güera.

Por causes que se desconocen, el montañeru Ramón Riera espeñóse y cayó al calce del ríu Seya onde foi alcontráu'l so calabre. El so compañeru yera alcontráu ilesu, ente peñes, a unos 100 metros percima del ríu.

Los dos montañeros pertenecíen al grupu xixonés El Trasgu Andayón y los sos compañeros de ruta, un grupu d'unes 40 persones, empezaron a echalos de menos en La Güera, onde los taba esperando un autobús.

Del rescate tanto del calabre ​del montañeru muertu como del so compañeru ocupóse l'helicópteru medicalizáu del Serviciu d'Emerxencies del Principáu d'Asturies.

Quien conocía a Ramón Riera y inclusive compartieren con él rutes de monte paeció-y raro lo socedío y cree que ye por un posible despiste. Nun creen que se desorientara, pola so esperiencia nesti tipu de rutes.

Recuerden que'l socesu tuvo llugar cuando volvía de faer cume, un momentu nel que solemos relaxanos tres l'esfuerzu de la xubida.