L’autopsia afita la muerte violenta de Javier Ardines

La Guardia Civil nun tien nengún sospechosu de la muerte del edil

L’autopsia afita la muerte violenta del conceyal d’IX en Llanes, Javier Ardines, calabre atopáu ayeri xunto a so casa de Llames de Pría (Llanes) con dellos golpes na tiesta.

Axentes de la Guardia Civil tuvieron ayeri bona parte’l día recoyendo muestres, güelgues y pruebes de la furgoneta, del camín y de los finques de cerca.

Tamién tuvieron declarando hasta l’anochecer la muyer y los dos fíos del conceyal fináu que desconocen qu’Ardines tuviere problemes concretos con dalguién.

Enagora, la Guardia Civil nun tien nengún sospechosu de la muerte del edil.

Sicasí, ta tomándose declaración a los vecinos pa saber si vieron o sintieron daqué na mañana del socesu.

Unu d’ellos aseguró que los sos perros montaren tal escándalu dos vegaes pela madrugada, que nuna d’elles llevantóse de la cama pa facelos callar.

L’Ayuntamientu de Llanes declaró llutu oficial nel conceyu güei y mañana. L’alcalde de Llanes, Enrique Riestra, dictó güei una resolución na que declara institucionalmente la condolencia y solidaridá de l’Alcaldía y la Corporación municipal, de los trabayadores públicos y de tolos vecinos a la familia y amigos del edil fináu.

Les banderes de tolos edificios públicos tán a media asta con un crespón de color negro mientras dure’l llutu oficial.

Ente les midíes tomaes en señal de duelu ta la suspensión del plenu convocáu pa esta mañana.

La familia, que yá presentó una denuncia polo que pasó, comunicó que la despedida del conceyal fadráse na intimidá y ensin actos oficiales o de partíu.