L'alcaldesa de Riosa recibió amenaces de muerte poco depués del crime de Javier Ardines

El coche del conceyal, José Manuel Pello, apaez rayáu y coles lletres DEP

IX d'Asturies denunció güei la realización esta madrugada d'una serie de pintaes con amenaces de muerte nel coche del conceyal d'esta formación en Riosa José Manuel Pello.

La coalición esixó güei la máxima atención y vixilancia énte los ataques que recibieron dalgunos de los sos cargos públicos nes últimes selmanes, como'l fechu esta madrugada nos cuatro llaos del vehículu de Pello, cola amenaza de que descanse en paz (DEP) escrito nes sos sigles nel techu y el capó del automóvil.

IX apunta que los daños materiales "súmense a les amenaces anónimes y tamién verbales a distintos cargos d'IX en distintos conceyos asturianos, y al espantible crime que se cobró la vida del conceyal llaniscu Javier Ardines".

Ello ye que pocu tiempu dempués del asesinatu, l'alcaldesa de Riosa, Ana Díaz, recibió una carta anónima na que la amenazaben con terminar igual que'l conceyal de Llanes.

L'anónimu foi treslladáu a la Guardia Civil, anque nun quixo facese públicu precisamente pa evitar especulaciones que pudieren interferir na investigación del crime de Llanes, nun exerciciu de responsabilidá política, apunta IX.

El coordinador xeneral d'IX d'Asturies, Ramon Argüelles, dirixóse esta mesma mañana a la delegada del Gobiernu, Delia Losa, pa que se dediquen cuántos medios seyan necesarios col envís de terminar con esta situación.

"Güei ye un día murniu pa IX d'Asturies porque al nuesu conceyal José Manuel Pello estrozáron-y el coche y punxéron-y amenaces de muerte con un Descanse en Paz (DEP). Y esto llega cuando n'IX tamos calteniendo un perfil baxu, a pesar de que tamos esgañaos per dientro polo que-y pasó al nuesu compañeru Javi (Ardines). Tamos mordiendo la llingua pa dexar trabayar na investigación, tragando nós los sapos", sorraya Argüelles.

L'alcaldesa de Riosa, Ana Díaz, amosó güei la so esmolición pola escalada de tensión nel so conseyu.

Esplicó que "los anónimos nun yeren nuevos, pero nesti casu, yá con daños materiales nel vehículu de Pello, medra, de manera esponencial, la medrana a que la situación puea escapase de les manes con daños mayores".

Por eso, pidió que "s'investigue hasta les últimes consecuencies pa facer cayer a los culpables".

"Lo único que fiximos en Riosa'l mio equipu y yo mesma ye trabayar pa dar respuesta a les necesidaes de los vecinos y de les vecines lluchando con esfuerzu y honestidá. Si creen que coles amenaces van dobleganos, equivóquense. Vamos siguir trabayando frente a quien solo defenden intereses particulares y non los de la mayoría de los vecinos y vecines de Riosa", dixo.

Pela so parte, l'Agrupación Socialista de Riosa y el grupu municipal amosó la so más enérxica conderga pol ataque al coche de José Manuel Pello.

Los socialistes de Riosa amuesen el so "más firme sofitu y solidaridá" al conceyal que recibió l'ataque y tamién al restu de conceyales d'IX na corporación de Riosa.