La Guardia Civil nun refuga que Pedro Nieva tuviera en Llanes nel momentu del asesinatu

La muyer del supuestu inductor del crime d'Ardines pensó nél dende'l primer momentu

"Pedro ¿qué fixisti?": Ye'l mensaxe que-y unvia Katia Blanco, prima de la muyer d'Ardines, al so home, l'agora deteníu Pedro Nieva. Anque ta consideráu'l inductor del asesinatu d'Ardines, los investigadores nun refuguen la so participación directa nos fechos.

Katia Blanco pensó de la participación del so home nel asesinatu de Javier Ardines dende'l primer momentu. La investigación recueye'l so intercambiu de wasaps na mañana del 16 d'agostu de 2018, una conversación a poques hores de que s'atopara'l cuerpu d'Ardines.

Los dispositivos móviles fueron cimeros pa reconstruyir esta hestoria que se desencadena n'avientu de 2017, cuando Pedro Nieva graba a Katia, la so muyer, nuna conversación con Javier Ardines que-y confirma la esistencia d'una relacion paralela.

Entró entós, según los investigadores, nun procesu intensu de celopatía que lu llevó a buscar métodos pa espiar a la so muyer, o a duldar de la mesma paternidá de los sos fíos. N'ochobre de 2018, dos meses dempués del asesinatu d'Ardines, Pedro Nieva dexa'l so teléfonu móvil pa reparar.

Centru yá de los pescudamientos, la Guardia Civi llogra l'autorización xudicial necesaria pal rexistru del dispositivu. Un intensu escrutiniu llogra reconstruyir pasu a pasu los movimientos y les conversaciones de los actores d'esti socesu.

Entós, atopen una fienda na coartada del propiu Pedro Nieva. Dende les 02:25 hasta les 08:55 de la mañana del dia del crime, el 16 d'agostu, hai una ventana temporal, un vaciu na so coartada. Polo que nun se refuga dafechu la so presencia nel escenariu del crime, anque l'agora deteníu niégalo.