La madre y el fíu del socesu de Grau yá tán nel Hospital de Valdecilla

La neña, de 11 años, pasó bien la nueche nel HUCA

La muyer mancada nel socesu de Grau yá ta siendo tratada na cámara hiperbárica del Hospital Universitariu Marqués de Valdecilla. Ellí ta tamién el neñu mancáu. La neña pasó bien la nueche nel HUCA. Nel socesu morrió'l padre de familia por inhalación de monóxidu de carbonu.

El centru hospitalariu de Valdecilla, en Cantabria, ta consideráu un referente nel tratamientu de pacientes afectaos por intoxicación, al cuntar con cámares hiperbáriques qu'ayuden a recuperar el nivel d'osíxenu en sangre. La muyer mancada ayeri en Grau yá ta siendo tratada nuna d'estes cámares y el fíu pequeñu, de 9 años, tamién ta ellí. La neña, de 11 años, pasó bien la nueche nel HUCA.

Foi un familiar quien dio l'avisu enantes de les 12:00 del mediudía al llegar a la vivienda. Cuando los bomberos entraron al inmueble, la madre y los sos dos fíos taben graves y el padre, Eduardo Suárez, de 48 años, foi atopáu yá ensin vida. Nel interior de la vivienda, los axentes detectaron una concentración mui alta de monóxidu de carbonu.

Nel llugar del socesu, los mancaos fueron atendíos por tres equipos d'unidaes de vixilancia intensiva enantes de ser evacuaos al HUCA, onde fueron estabilizaos.

Munchos vecinos y amigos fueron a la casa de La Mata na xornada d'ayeri. Grau sigue esmolecida por una familia mui querida nel conceyu.