Los presuntos implicaos tuvieron dos vegaes en Llanes enantes de matar a Ardines

L’intermediariu pagó 20.000 euros a los arxelinos dempués del crime

Too entama, como adelantó ayeri TPA Noticies, el 9 d’avientu de 2017. Esi día. Pedro Nieva graba una conversación a la so muyer, Katia Blanco, y a Javier Ardines -ensin qu’ellos lo sepan- nun bar de Nueva de Llanes.

Lo que siente Pedro Nieva más tarde, el "llevamos años llibrando", que-y diz Ardines a Katia, y la rempuesta d’ella "sí, hai que tener cuidáu", confirmaríen pa él la rellación ente los dos, provocando’l tráxicu final del 16 d’agostu.

Dende esa grabación, Katia volvió tres vegaes a Llanes: dos sola, enantes del crime; y una, col so home, el 7 y 8 de setiembre pa les fiestes de La Blanca en Nueva. Pedro Nieva yera yá entós el principal sospechosu de la Guardia Civil.

El 27 de xunetu y el 1 d’agostu de 2018 son les dos feches nes que los implicaos nel casu preparen l’asesinatu d’Ardines. En xunetu acérquense a Belmonte de Pría, Pedro Nieva, Jesús Muguruza y unu de los arxelinos, Jilali Benatia col envís de conocer l’escenariu de los fechos.

21 díes enantes del asesinatu, Pedro Nieva, entama un viaxe dende Amorebieta hasta Belmonte de Pría. Nun va solu. Esa mañana del 27 de xunetu de 2018 acompáñenlu, según se pudo afitar col rexistru de la señal móvil, los repetidores y llistaos teléfonicos, Jesús Muguruza, l’intermediariu y unu de los arxelinos, jilali Benatia.

El coche tien una avería en Cantabria y Jesus y Jilali proponen dar la vuelta. Pero Pedro Nieva quier llegar a Llanes. Alquilen un coche nel aeropuertu de Santander col que lleguen a Llanes.

Pedro Nieva tien la gran necesidá de dir esi día y non otru, creen los axentes, porque ye l’últimu día que la casa ta vacía. N’agostu, la so muyer Katia Blanco entamará la so temporada de vacaciones.

Según la declaración de darréu de Jilali Benatia, esi 27 de xunetu Pedro Nieva enséña-y el llugar p’abordar a Ardines, amás del barcu. De vuelta a Vizcaya alcuerden el preciu final: de los primeros 20.000 que pide l’arxelín axústase la cifra a 11.000. La primer parte del pagu faise nel intre: 5.000 euros, que saca Nieva de la so riñonera.

Cinco díes dempués, el 1 d’agostu, ye la primer emboscada al conceyal o, como recueye l’atestáu de la Unidá Central operativa, el primer intentu de matar a Ardines. Los rexistros móviles y la situación de los vehículos ye cuasi igual a la de la mañana del asesinatu, el 16 d’agostu.

L’intermediariu pagó 20.000 euros a los arxelinos dempués del crime

El dineru pagao por esti crime va más allá d’esos primeros 11.000 euros. Según declara Yilali Benatia, Maamar Kelli, l’otru arxelín, quixo la metá de los primeros 5.000 euros. Yilali negóse y amenazó con abandonar.

Pedro Nieva subió, entós, hasta los 12.000 euros pa que’l repartu nun fuere menor pa Yilali. Una vegada fechu’l crime y conociendo, diz Yilali, la muerte de Javier Ardines pelos medios, pidió 25.000 euros más de los que yá recibiere.

Foi entós cuando Jesús Muguruza, l’intermediariu, pagó , esa vegada, el dineru, un total de 20.000 euros.