Muerre una muyer al sufrir una cayida en Torrecerréu, en Picos d'Europa

Primer accidente mortal d'anguaño na redolada de los Picos d'Europa

Una muyer morrió esti domingu tres sufrir una cayida na zona de Torrecerréu, nel conceyu de Cabrales, en Picos d'Europa, informó'l Serviciu d'Emerxencies del Principáu d'Asturies (SEPA).

El Centru de Coordinación d'Emerxencies recibió l'avisu a les 15:14 al traviés d'una llamada na que sollertaben de qu'una muyer cayera cerca d'El H.ou de los Cabrones, nel últimu neveru de Torrecerréu, nuna zona na qu'había borrina.

El SEPA movilizó al Grupu de Rescate a bordu del helicópteru medicalizáu de Bomberos d'Asturies, anque la borrina torgó l'accesu de l'aeronave a la zona, polo que dos bomberos-rescatadores y el médicu-rescatador quedaron en tierra pa entamar a pie l'accesu hasta onde taba la muyer accidentada.

Poco dempués, unu de los helicópteros multifunción del SEPA foi hasta onde la visibilidá dexó a tres bomberos-rescatadores más pa sumase al dispositivu, mientres que l'helicópteru medicalizáu averó a dos integrantes del Grupu de Rescate y Intervención en Monte (GREIM) de la Guardia Civil.

Poco dempués de les 19:30, los primeros rescatadores del SEPA llegaron a la zona onde taba la muyer, pero namás pudieron confirmar la so muerte.