Muerre una persona nun españíu nuna pirotecnia en Cangas del Narcea

El trabayador de 41 años taba faciendo un preparáu de pólvora

Un trabayador de 41 años morrió nun españíu esti miércoles nuna empresa pirotécnica asitiada nel pueblu de Val.linas, en Cangas del Narcea, informaron fontes de la Guardia Civil y el Serviciu d’Emerxencies del Principáu.

L’españíu foi al rodiu de les 9:15, cuando’l trabayador de la empresa Pirotecnia Pablo, una de las compañíes de pirotecnia más importantes d’Asturies fundada en 1895, taba preparando un preparáu de pólvora.

El trabayador, vecín de Cangas del Narcea, taba dientro d’una de les casetes que tien la empresa, y que quedó destruyida pol españíu.

Al llugar fueron delles patrulles de la Guardia Civil, con especialistes n’armes y esplosivos, asina como la Policía Xudicial y los servicios sanitarios, anque, al paecer, nun hubo otros estrozos personales.

El conceyu de Cangas del Narcea, con daqué más de 12.000 habitantes y asitiáu nel suroccidente d’Asturies, cunta con una gran tradición pirotécnica marcada pola tradicional fiesta de la Descarga na que cada 16 de xunetu, por mor de la festividá de la Virxe del Carme, faise españar más d’una tonelada de pólvora mediante barrenos y el llanzamientu d’unos 80.000 voladores en menos de diez minutos.