Prindaos los presuntos asesinos de Javier Ardines

Pedro Nieva, consideráu l'autor intelectual del crime

Seis meses y tres díes depués del asesinatu del conceyal d'IX en Llanes Javier Ardines, la Guardia Civil detuvo al presuntu inductor del crime, un amigu del conceyal qu'encargaría'l crime a dos sicarios non profesionales movíu polos celos y cola collaboración d'un cuartu prindáu.

Los axentes prindaron na madrugada d'esti martes na so vivienda d'Amorebieta (Vizcaya) a Pedro Nieva, consideráu l'autor intelectual del crime cometíu'l pasáu 16 d'agostu na parroquia llanisca de Belmonte de Pría, a perpocos metros de la vivienda d'Ardines nesti conceyu de la mariña oriental asturiana.

El deteníu, casáu con una prima de la muyer del conceyal, caltenía una estrecha amistá cola víctima afitada nes sos estancies en Llanes, onde tien una casa mui cerca de la d'Ardines y a la que tamién diba dellos fines de selmana pola so proximidá a Amorebieta, poco más de 200 kilómetros, anque desque se cometió'l crime nun lu volvieron ver en Llanes.

Fontes cercanes a la investigación consideren que Pedro encargó'l crime movíu polos celos énte una posible relación ente la so muyer y el conceyal y valióse de l'ayuda d'un conocíu, tamién prindáu en Vizcaya, al igual qu'unu de los dos arxelinos supuestos autores del crime. Nel casu del segundu entamáronse los trámites pa la so estradición dende Suiza.

La Guardia Civil considera rematada asina una investigación, bautizada como operación 'Strabe', "mui complexa" na que se trataron "bien de datos con muncha paciencia y mui bon trabayu", según señaló'l teniente coronel de la comandancia de Xixón, Francisco Javier Puerta.