Un muertu y cuatro mancaos nun accidente de tráficu en La Ribera

La víctima y el mancáu más grave tuvieron que ser escarcelaos de los vehículos nos que viaxaben

Un home de 40 años morrió y otros cuatro homes d'ente 28 y 45 años resultaron mancaos, dos d'ellos graves, nun accidente de tráficu nel que se vieron implicaos tres turismos y un camión na A-66, nel conceyu de La Ribera.

L'accidente foi al rodiu de les 6:30 d'esti miércoles a l'altura del puntu kilométricu 35,800, en sen Uviéu, informó'l Serviciu d'Emerxencies del Principáu d'Asturies (SEPA).

Según los datos apurríos pol Serviciu d'Atención Médica Urxente (SAMU), el muertu ye un home de 40 años, mientres que los mancaos fueron treslladaos toos al Hospital Universitariu Central d'Asturies (HUCA), n'Uviéu.

Los más graves son dos homes de 29 y 28 años, mientres que los otros dos, de calter leve, son dos homes de 45 y 28 años.

Tanto'l muertu, conductor d'un turismu, como ún de los dos mancaos graves tuvieron que ser escarcelaos de los vehículos nos que viaxaben por efectivos de bomberos.

La Guardia Civil, que s'encargó de los trámites pa proceder al llevantamientu del cadabre y cortó l'autopista, ta investigando les circunstancies del accidente.