Vecinos de La Cortina entamen a volver a les sos cases

Los técnicos trabayen nel argayu pa evitar más argayos

Dalgunos de los vecinos del pueblu de La Cortina (L.lena), arrasáu en parte ayeri por un argayu, pudieron volver güei a les sos cases.

Por precaución, y énte l’avisu de lluvia fuerte, ayeri decidióse desallugar el pueblu pela nueche pa que los vecinos nun durmieren ellí.

Técnicos del Ayuntamientu de L.lena y de la Conseyería d’Infraestructures tán trabayando nel argayu p’asegurar la zona y evitar qu’haya nuevos argayos, según aseguró güei’l conseyeru de Presidencia, Guillermo Martínez.

Martínez señaló que l’argayu del monte causó daños materiales al afectar a cinco cases del pueblu anque nun llegó a provocar daños personales a pesar de la so magnitú.

Nesti sen, señaló que cuando foi l’esbarrumbe del monte en La Cortina namái taben seis persones frente a les 50 que taben nesti pueblu’l domingu pasáu, dalgunes d’elles practicando escalada na zona del esbarrumbe.

Dempués de desactivar a media tarde d’ayeri’l Plan Territorial d’Emerxencies (PLATERPA) la lluvia fuerte que se rexistró dende esa hora obligó a facer una nueva inspección del tarrén énte’l mieu a nuevos argayos y optóse por desallugar por precaución a cuatro families del pueblu.

Un retén de bomberos del Serviciu d’Emerxencies (SEPA) tuvo tola nueche en La Cortina faciendo llabores de vixilancia y, dempués de la nueva revisión fecha esta mañana qu’afitó que l’argayu ta estabilizáu, les xeres d’inspección quedaron al cargu de los técnicos del Ayuntamientu de L.lena y de la Conseyería d’Infraestructures.

Agora toca midir y estudiar cómo abordar esti argayu escomanáu. Una xera que nun sedrá fácil porque los caminos en La Cortina son estrechos y va facer falta maquinaria pesada porque les piedres más grandes que cayeron pesen más de 200 tonelaes.