Dos mancaos leves nun accidente de tráficu na Autovía del Cantábricu al so pasu per Ribeseya

Treslladaos al hospital de Les Arriondes los dos mancaos, escarcelaos de los sos vehículos

Dos persones mancaes, con pronósticu reserváu, fueron treslladaes al Hospital de Les Arriondes por mor del accidente d’esti llunes al chocar un camión y un turismu nel kilómetru 316 de l’A-8, en Ribeseya, que provocó caravanes de 11 kilómetros.

El siniestru foi a les 10:55 en sen Cantabria. Al llugar del accidente fueron un equipu d’Atestaos y delles patrulles de la Guardia Civil de Traficu.

Una llamada al Centru de Coordinación d’Emerxencies alertó de qu’un camión frigoríficu llevare per delantre dellos vehículos en caravana, y que, polo menos, había dos persones atrapaes nun vehículu, informa’l Serviciu d’Emerxencies del Principáu d’Asturies (SEPA).

Bomberos con base nos parques de Llanes y Cangues d’Onís, amás del Grupu de Rescate a bordu del helicópteru medicalizáu, fueron al llugar del accidente, onde collaboraron nes xeres d’escarcelación y atención a los mancaos, anque a la fin nun fizo falta la so intervención pal treslláu de los afectaos.

Una vegada na zona, los bomberos quitaron el techu del vehículu nel que los sos dos ocupantes taben atrapaos, y dempués d’inmovilizar a los dos homes sacáronlos de dientro’l coche cola tabla de rescate.

L’accidente provocó caravanes d’hasta 11 kilómetros en dirección Santander, anque yá se restableció’l tráficu.