Piden prisión ensin fianza pal acusáu d'agredir al so cuñáu con una motosierra

Los fechos podríen ser constitutivos d'un delitu d'homicidiu en grau de tentativa

La Fiscalía del Principáu d’Asturies solicitó l’ingresu en prisión provisional comunicada y ensin fianza pal home prindáu por agredir al so cuñáu con una motosierra’l sábadu pasáu n’El Valle Altu de Peñamellera, fechos que considera que podríen ser constitutivos d’un delitu d’homicidiu en grau de tentativa.

La midida foi plantegada pol Ministeriu Públicu na comparecencia del acusáu énte’l Xulgáu d’Instrucción númberu 1 de Llanes, encargáu de practicar les dilixencies.

El Ministeriu Fiscal informó de la solicitú fecha al xulgáu, asina como de los delitos que, na so opinión, podríen ser imputables al prindáu, anque esplicó que fizo esta calificación “ensin perxuiciu de que puea camudase na instrucción del procedimientu”.

Sicasí, la Fiscalía del Principáu esplicó que solicitó l’adopción de la midida cautelar al entender que “hai riesgu de reiteración delictiva” y de que’l prindáu “atente más gravemente escontra la víctima”.