Alcontraos cinco escursionistes que pasaron la nueche perdíos en Picos d'Europa

Dos adultos y tres mozos perdiéronse mientres faíen la ruta al Llagu Ercina

Un grupu de cinco escursionistes, ente los qu'había dos menores, que se perdieron ayeri mientres faíen una ruta en Picos d'Europa fueron alcontraos esta mañana por axentes de la Guardia Civil y efectivos del Serviciu d'Emerxencies del Principáu tres una nueche de busca.

Fuentes de la Guardia Civil informaron de que la busca entamó arriendes de qu'a les 22:00 d'ayeri, el Grupu de Rescate y Intervención en Monte con base en Cangues d'Onís recibiera un avisu del guarda del abellugu de Vega Ariu de que dos adultos y tres mozos podríen tar perdíos mientres faíen la ruta al Llagu Ercina.

Momentos enantes, según informó esi guarda, recibiera una llamada dende Portugal na que-y indicaben, que nun sabíen nada de los componentes del grupu y que daes les hores teníen que tornar.