Un neñu xixonés de seis años muerre tres ser atacáu por un perru

El pequeñu taba en casa d'unos familiares na villa portuguesa de Chaves

Un neñu de seis años, vecín de Xixón , perdió la vida ayeri a les 19:00 tres ser atacáu por un rodwailer na villa portuguesa de Chaves, cuando taba de visita en casa d'un pariente cercanu onde foi atacáu pol animal, de la mesma familia.

Los fechos causaron muncha tristura nel so círculu más cercanu y tamién nel centru onde estudiaba'l neñu asitiáu nel barriu d’El Bibio.

Según fontes cercanes a la familia taba na casa d'unos familiares cuando un perru suyu de raza peligrosa y que nun diera nunca problemes atacó al neñu.

Dende ehí lleváronlu d'urxencia a un centru sanitariu pero les feríes que sufrió yeren d'estrema gravedá. L'ataque mortal del animal ta siendo investigáu pola Policía de Portugal.

El menor yera alumnu del Colexu L'Asunción. Los restos mortales del neñu van ser treslladaos a Xixón, onde ta previsto que se celebre'l funeral. La comunidá educativa ta atristayada tres conocer la traxedia de la que foi víctima'l neñu y prepárase psicolóxicamente pa cuntar lo socedío a los sos compañeros.