Un prindáu en Ribeseya pol cultivu de 39 plantes de mariguana y fraude eléctricu

Les plantes midíen metru y mediu d'altura y pesaron más de nueve kilos

Un home de 52 años foi prindáu como presuntu responsable del cultivu de mariguana nel anexu d’una caseta de preseos asitiada en Ribeseya na que la Guardia Civil intervino’l 2 de xineru pasáu 39 plantes de cannabis sativa de metru y mediu d’altura que pesaron más de nueve kilos.

La Guardia Civil tuvo conocimientu a entamos d’avientu que nuna finca de Ribeseya podía haber una plantación "indoor" de mariguana que, dempués de dellos díes de búsqueda n’horariu nocherniegu, foi localizada nel anexu d’una caseta de preseos d’una vivienda unifamiliar, informó esti martes l’institutu armáu.

Los axentes, que vieron per un furacu’l rellumu naranxa de les llámpares de sodiu que s’usen pa cultivar mariguana n’espacios zarraos, tamién comprobaron que, d’un poste d’allumáu públicu asitiáu nel camín cerca de la vivienda, salía un cable que s’inxertaba na finca de forma soterrada en dirección a la caseta de preseos.