Argayu de grandes dimensiones en La Cortina, L.lena

El llugar foi desallugáu pol esbarrumbe d'un llau del monte

Esta mañana hebo un argayu de grandes dimensiones en La Cortina, L.lena. El llugar foi desallugáu por protección y nun hebo mancaos.

L'alcaldesa de L.lena, Gema Álvarez, en declaraciones a TPA Noticies señaló que los servicios del 112 Asturies, con ayuda de la Unidá Canina de Rescate, inspeccionaron la zona y nun hai mancaos.

Alvarez desplicó que son cuatro les cases que quedaron dafechu esbarrumbaes por ello, desallugaron a los vecinos del llugar y tán cerraos los accesos.

Por cuenta de les grandes dimensiones del argayu la Conseyería de Presidencia activó a les 12:59 hores el Plan Territorial del Principáu d'Asturies (PLATERPA) en situación 0 tres desallugar el sitiu.

Nel llugar tán efectivos de Bomberos del Serviciu d'Emerxencies (SEPA), la Unidá Canina de Rescate y movióse tamién l'helicópteru de la entidá pa facer un rastrexu aereu de la zona.

Dende'l Centru de Coordinación d'Emerxencies del 112 Asturies informar de lo asocedío a la Policía Local, a la Guardia Civil y al SAMU qu'unvió una UVI-móvil al llugar y sollertaron tamién a los responsables d'infraestructures del Principáu y al propiu conceyu.