Atopen muertu a un home d'un tiru na cabeza en La Felguera

De Lorenzo venceya'l socesu a un problema de droga

Iván C.V., el mozu de 31 años qu'atoparon muertu ayeri nuna cochera de La Felguera, recibió un tiru na cabeza y otru nel llombu, según conseñó l'autopsia que se-y fizo güei nel institutu anatómicu forense de la capital asturiana.

Fuentes policiales informaron que siguen tratando d'atopar l'arma cola que se ficieron los dos disparos y que los investigadores baraxen y tienen abiertes delles hipótesis.

Sicasí, el delegáu del Gobiernu n'Asturies, Gabino de Lorenzo, dixo a los periodistes que güei siguíen la parada militar celebrada nel acuartelamientu de Cabu Noval por mor de la fiesta de la Inmaculada, que'l socesu podría tar venceyáu con un axuste de cuentes venceyáu cola droga.

"Foi un problema de droga, dicho con prudencia y teniendo en cuenta los antecedentes de la víctima", conseñó'l delegáu del Gobiernu ante esti crime, según recueye na so edición dixital La Nueva España.

De Lorenzo desvinculó esti crime d'otros que socedieron estos últimos díes n'Asturies y comseñó que la rexón sigue siendo una de les más segures y con menores índices de criminalidá del país.

El cuerpu del mozu atopáronlu alredor de les 18:30 hores d'ayeri nuna cochera allugada nel númberu 8 de la cai Inxenieru Fernández Casariego.