Busquen n'El Ríu Nalón a la moza desapaecida en Pravia va una selmana

Revisáronse les viviendes vacíes de Peñaullán, La Vega y les carreteres cercanes

La Guardia Civil esplegó un ampliu operativu de busca esti llunes pa tratar d'alcontrar a Ana Belén Álvarez Méndez, de 37 años y vecina de Peñaullán (Pravia) que sigue desapaecida dende'l pasáu 15 de marzu cuando foi vista per última vegada cabo El Ríu Nalón.

Efectivos del Grupu Especial d'Actividaes Subacuátiques (GEAS), el Grupu de Rescate y Intervención de Monte (GREIM) de Mieres y patrulles de Seguridá Ciudadana de la Tercer Compañía de la Guardia Civil participen nel operativu que se centra sobre manera nel ríu, al ser l'últimu llugar onde se pierde la so pista.

La muyer mide 160 centímetros d'altor, pesa 50 quilos, tien el pelo en media melena llisa de color negro, güeyos escuros y usa gafes y la última vegada que foi vista llevaba un pantalón de color escuro y sudadera colorada.

Fontes policiales aseguraron que'l fechu de que necesite medicación y los díes trescurríos desque foi vista per última vegada llevaron a activar un operativu especial pa la so localización.