Desallugaos los vecinos de dellos edificios por un incendiu n'Uviéu

Tres incendios rexistraos en bazares chinos nes últimes tres selmanes

Los bomberos dieron por controláu l'incediu rexistráu esta mañana nun bazar chinu allugáu nel númberu 36 de l'avenida de Pumarín d'Uviéu, y qu'obligó al desallugu por precaución de los vecinos de cinco inmuebles, informaron fontes del Conceyu d'Uviéu.

Los bomberos d'Uviéu punxeron en marcha un ampliu operativu p'apagar l'incendiu, que se declaró sobre les 9:00 hores y que se dio por controláu a les 11:00 hores.

El fueu xeneró una gran columna de fumu negro visible dende dellos puntos de la capital del Principáu, y inclusive dende les contornes de la ciudá.

L'incendiu  obligó al desallugu por seguridá del inmueble de cinco altures ode s'alluga'l bazar Mao, amás de los númberos 34 y 38 de l'avenida de Pumarín y los númberos 3 y 5 de la cai Luis Braille.

Hasta'l llugar moviéronse hasta siete vehículos de bomberos, cinco d'Uviéu y dos del Serviciu d'Emerxencies del Principáu d'Asturies, anque dalgunos d'ellos yá se retiraron, amás de media docena de dotaciones de la Policía Local, nun operativu qu'obligó a cerrar la vía al tráficu.

Una muyer tuvo que ser atendida nel llugar por una crisis d'ansiedá.

La propietaria del bazar chinu afirmó que desconoz l'orixe del accidente, que yá ta siendo investigáu por axentes de la Policía Científica.

L'alcalde d'Uviéu, Wenceslao López, y el conceyal de Seguridá Ciudadana, Ricardo Fernández, moviéronse hasta'l llugar pa interesase pola situación.

Tres incendios rexistraos en bazares chinos nes últimes tres selmanes

Con esti de Pumarín son yá tres los icedios rexistraes en bazares chinos nes últimes tres selmanes. El primeru d'ellos foi'l 24 de xineru en Sotrondio. El fueu obligó a desallugar un edificiu. Dende'l principiu trabáyase cola hipótesis de que la quema foi intencional pola so presunta relación col robu nuna peluquería cercana.

El 1 de febreru, el miércoles pasáu, el plasmu lleváronlu los propietarios d'otru bazar chinu de La Llosa, n'Uviéu. Los dueños taben dientro y combatieron el fueu con un estintor hasta que llegaron los bomberos.

La Policía Nacional refuga, pel momentu, qu'esista rellación ente les tres quemes.