Dos muertos y cuatro mancaos nel choque frontal de dos turismos en Llangréu

La vía tuvo cortada ente Sama y Ciañu cerca de dos hores

Una muyer de 68 años y el so fíu de 39, dambos vecinos d'Uviéu, morrieron esti miércoles nel choque frontal de dos vehículos na carretera AS-117 (Corredor del Nalón), en Llangréu, nun accidente nel qu'otres cuatro persones resultaron mancaes, informaron la Guardia Civil y el Serviciu d'Emerxencies del Principáu d'Asturies (SEPA).

De los cuatro mancaos, un varón de 64 años ta grave y otru de 72, con pronósticu reserváu, mientres que los otros dos resultaron leves, según la información dada pol Serviciu d'Atención Médica Urxente (SAMU).

L'accidente foi poco primero de les 13:00 nel kilómetru 5,500 de la citada vía, en sen Riañu, que tuvo que ser cortada, al altor de Sama, hasta les 14:45.

Al llugar del accidente fueron Bomberos del SEPA, que tuvieron qu'escarcelar a les víctimes de dambos vehículos, y patrulles de la Guardia Civil pa cortar el tráficu y delles ambulancies p'atender a los mancaos, dalgunos de los que fueron evacuaos al Hospital Valle del Nalón.