Dos robos en menos d'ocho meses nuna vinatería de Xixón

Los desperfectos y la cantidá robada suponen unes perdes de 25.000 euros

Una vinatería de Xixón sufrió nos postreros ocho meses dos robos. Y lo que ye más llamativo, en poco más de 30 segundos. El postreru foi la madrugada del miércoles al xueves.

Les cámares de seguridá nun pudieron captar esti últimu asaltu, pero sí'l robu que tuvo llugar en setiembre del añu pasáu. Solo 34 segundos ye'l tiempu que necesitó'l lladrón pa forzar la puerta, abrir la caxa rexistradora, llevar el dineru y fuxir.

Un modus operandi asemeyáu que fai sospechar que dambos robos fueron cometíos por una mesma persona. Sorpriende la maña cola que pudo forzar la caxa.

L'allugamientu d'una persiana ye la última esperanza pa evitar un tecer asaltu. Los desperfectos y la cantidá robada supunxeron unes perdes de 25.000 euros pa esti establecimientu.