La Policía pide la collaboración ciudadana nel casu del asesinatu del ñácaru de Nuevu Roces

La delegada del Gobiernu espera que'l casu s'igüe bien llueu y considéralu un actu de crueldá

La delegada del Gobiernu confía que'l casu del ñácaru qu'apaeció nun contenedor en Roces, Xixón, ígüese bien llueu. L'autopsia revela que foi asesináu. Delia Losa considéralu un actu de crueldá.

La Policía Nacional fai una llamada a la collaboración ciudadana pa poder dar col paraderu de la madre del ñácaru. Nun se refuga que la muyer escondiera'l so embaranzu.

Créese que l'agresión que sufrió'l pequeñu namás nacer, y que provocó la so muerte, pudo venir de la redolada cercana a la muyer.

La investigación ta abierta, y dende la Policía reclamen a los ciudadanos qu'apurran cualquier datu que consideren relevante al traviés del 091.

Nes últimes hores, la Policía siguió tomando declaración a los vecinos de la zona y yá alcontró a la media docena de muyeres embaranzaes que viven nes viviendes cercanes al llugar del sucesu.