Tres muertos n'accidente de tractor nun mes

Inflúi l'antigüedá de los vehículos, la orografía complicada y l'escesu de confianza

Col fináu ayeri n'Oles, en Villaviciosa, yá son tres los finaos n'accidente de tractor nun mes n'Asturies. Nesti tiempu tamién se rexistró un mancáu que tuvo que ser treslladáu al HUCA.

El vehículu, qu'arrastraba un remolque con madera n'Oles, volcó nuna zona mui pindia y atrapó embaxo al conductor. Los servicios d'emerxencies namái pudieron certificar que finare y necesitóse'l sofitu de los bomberos pa poder rescatar el cuerpu.

A entamos de mes, tamién en Villaviciosa, otro home de 57 años resultó mancáu nuna pierna al volcar el so tractor nuna zona de difícil accesu qu'obligó a los bomberos a llevalu hasta sacalu a la pista forestal más cercana.

Nos primeros díes de xunu tamién se rexistraba un siniestru asemeyáu en Casu. La víctima, un home de 61 años que volcó col so tractor a El Ríu Paniceres.

A él amiéstase un pravianu de 31 años, finó'l 24 de mayu mientres trabayaba una finca en Santa Eufemia, en Salas. Tamién yera un tarrén con desnivel. L'anterior accidente mortal foi en payares de 2016 n'Allande.

Los siniestros con tractor son frecuentes en toa España y de la investigación de los mesmos los especialistes conclúin qu'inflúi l'antigüedá de los vehículos, una orografía complicada del tarrén y l'escesu de confianza de los conductores al tar faciendo llabores avezaes.