Treslladáu al HUCA un cazador dempués de ser embestíu por un xabaril en Cuallagar

L'home presenta traumatismu torácicu y nel miembru inferior izquierdu, amás de múltiples mancadures producíes por un xabaril

Un home mancóse esti sábadu, con traumatismu torácicu y nel miembru inferior izquierdu, amás de múltiples mancadures producíes por un xabaril nuna cacería na contornada del pueblu de Cuallagar, na llende ente Grau y Tameza, informa’l 112.

Efectivos del Grupu de Rescate del Serviciu d’Emerxencies del Principáu d’Asturies (SEPA) nel helicópteru medicalizáu de Bomberos d’Asturies, evacuaron al mancáu al Hospital Universitariu Central d’Asturies (HUCA).

El Centru de Coordinación d’Emerxencies recibió un avisu, a les 11:04, nel que se dicía qu’un xabaril mancare a un home y nun llugar nel que nun había accesu rodáu.

Una vegada na zona, el pilotu de l’aeronave medicalizada pudo tomar tierra a unos 50 metros del llugar nel que taba’l cazador mancáu, onde pudo ser atendíu pola médica-rescatadora y, dempués de coloca-y una férula pa inmoviliza-y la pierna, lleváronlu en parigüeles hasta l’helicópteru pa entamar la so evacuación al HUCA.