Acaba la prohibición de dexar pa carroña a los animales muertos nel monte

El Principáu asoleya 330 zones de pastu onde podrán abandonase los cadabres

Los ganaderos de la mayor parte de los conceyos asturianos yá nun tendrán que recoyer a los sos animales muertos nel monte, como veníen faciendo dende l'añu 2002.

El Boletín Oficial del Principáu d'Asturies asoleya güei la resolución del Gobiernu del Principáu que permite dexalos pa carroña.

Dende agora, animales carroñeros y otros vertebraos como osos y llobos, que tamién inxerten carroña nes sos dietes, dispondrán de más alimentu.

Hasta agora los ganaderos taben obligaos a retirar los cadabres de los animales de les sos ganaderíes, que se llevaben a incinerar a Coxersa.

El Gobiernu asoleya 330 zones de pastu nes que se puen abandonar los cadabres d'animales. Afecten a cuasi tolos conceyos asturianos.

Queden escluyíos 11, dende Avilés hasta Llanera, por mor de que formen parte del área d'influyencia del Aeropuertu d'Asturies y les aves carroñeres puen suponer riesgu de colisión con aeronaves.