El Muséu del Oru d'Asturies ta dedicáu al oru, al so valir y la so hestoria

El batéu d'oru ye una actividá mui enraigonada en Navelgas

Dende 2006, l'antigua casona Capalleja ye sede del Muséu del Oru d'Asturies. Enclaváu nel Barriu San Nicolás de Navelgas, l'equipamientu avéranos al papel que'l preciáu metal tuvo nes distintes civilizaciones a lo llargo la hestoria, a la so simboloxía y, por supuestu, a l'actividá aurífera na contorna.

La fiebre del oru nunca s'abandonó en Navelgas. Dende'l zarru de la esplotación industrial nos años 50, la busca d'oru siguió, yá de manera artesanal, nos ríos Navelgas, Yerbu y Bárcena, que van arrastrando tol material dende los montes.

El batéu d'oru anguaño ye una xera mui enraigonada nel pueblu. Dos asociaciones encárguense de que la tradición nun desapaeza. L'Asociación de Buscadores d’Oru Enrique Sanfiz ocúpase de tresmitir la práctica del batéu nos ríos de la contorna y l'Asociación de Bateadores d'Oru Barciaecus entama añalmente'l Campeonatu Nacional de Batéu d'Oru, que se celebra cada branu en Navelgas. Una prueba deportiva de velocidá qu'axunta alredor de 300 participantes en cada edición.

Navelgas tamién foi sede, dos vegaes, del Campeonatu Mundial de Batéu, dando bona amuesa de la proyección internacional que'l recursu supón pa la contorna.

El batéu atrái cada vez a más xente. Los nuevos buscadores nun anden a la gueta riqueza, sinón de la emoción de ver rellumar l'oru nes sos batees. Cualesquier pue facelo gracies a los talleres que se faen a diario nel Muséu del Oru d'Asturies pa entamar na práctica.