Zapico busca salvar la "desconfianza" de los conceyos pa desendolcar l'área central

Ovidio Zapico quier acabar la llexislatura con más de 10.000 viviendes públiques n'alquiler

Ovidio Zapico reconoció que l’anterior proyectu pa crear un área central foi "fallíu", lo que pudo crear "della desconfianza" ente los conceyos, poro, quier reinicialu cola pretensión de salvar esta rocea poniendo en situación d’igualdá a tolos conceyos que participen nel mesmu.

Na so comparecencia na Xunta Xeneral pa informar sobre’l programa de gobiernu nes árees de la so competencia, Zapico dio anuncia de qu’impulsará’l desendolcu de les Árees de Collaboración Intermunicipal (ACIs) col envís de favorecer la cooperación ente ayuntamientos na prestación de servicios.

Esplicó qu’hai que desendolcar una “estructura flexible”, que facilite l’inxerimientu voluntariu de los ayuntamientos y que nun implicará la creación d’estructures alministratives complexes y, pa la so financiación, espera usar fondos locales y recursos europeos.