La costera del bonitu podría allargase hasta ochobre

Sucédense les descargues, hasta 128.000 kg de media per selmana

De momentu consumióse un 40% de la cuota asignada a los barcos asturianos, polo que la costera podría espardese hasta ochobre, a diferencia d’otros años que llegó a acabar n’agostu. Ta descargándose a bon ritmu, la selmana pasada puyáronse 128.000 kg de bonitu na rula d’Avilés y llevense vendíos más d’un millón de kilos asegura Ángel Muñoz, director técnicu de la rula d’Avilés.

Otru aspectu positivu ye que se tán pescando pieces más grandes que se venden un 20% más cares que l’añu pasáu nestes feches. El kilo na rula ronda los 5,20 euros. Esto dexa a los armadores siguir pescando, porque compénsa-yos anque’l bonitu s’alloñe de la costa del Cantábricu.

Nes pescaderíes el bonitu sigue siendo la estrella, con bones ventes y la confianza de que siga habiendo polo menos un par de meses más señala Iván Guillén, de Casapesca.

Conforme avanza’l branu, el bonitu sigue migrando p’agua más frío del Golfu de Vizcaya, lo que medra les captures. La mayor concentración de barcos ta agora en La Estaca de Bares.

L’añu pasáu la rula avilesina terminó la costera del bonitu con 1,2 millones de kilos vendíos a una media de 3,70 euros el kilo.