L’ex-conceyal de Pravia acusáu d'un accidente mortal diz que bebió "lo normal nuna boda"

La Fiscalía diz que'l conceyal guiaba de manera peligrosa, a velocidá escesiva y tres beber alcohol

L'acusáu de provocar la muerte d'un home nun accidente de carretera en Pravia, en xunetu de 2017, dixo esti llunes énte'l xuez qu'aquél día bebiera "lo normal nuna boda", tres almitir que na comida celebrada en Salinas consumió vinu y dempués vermú y una copa.

La Fiscalía y l'acusación particular coincidieron en pidir una pena de cuatro años de prisión y privación del carné seis años pa esti conductor, daquella conceyal en Pravia, que provocó la muerte d'un home nun accidente de tráficu cuando conducía de manera peligrosa, a velocidá escesiva y tres beber alcohol.

Los fechos asocedieron sobre les cuatro de la madrugada del 23 de xunetu de 2017, cuando l'acusáu, de 41 años, circulaba pela AS-16, en dirección a Curniana a velocidá escesiva, coles sos facultaes alteriaes y amenorgaes porque inxiriera alcohol primeramente y de manera peligrosa, según sostién la Fiscalía y atestigüen axentes de la Guardia Civil de Tráficu.

Trés de los axentes qu'atendieron l'accidente coincidieron en conseñar que l'acusáu presentaba síntomes de tar enfiláu y unu d'ellos pudo comprobar darréu que'l conductor saliera de la carril pel llau derechu hasta pegar col quitamieos.

Pese a esi percance, según estes pesquises, el conductor siguió conduciendo hasta perder el control del vehículu, invadir la otra carril y pegar escontra'l coche d'un home que circulaba correctamente y resultó muertu.

Lo primero que dixo'l conductor tres l'accidente foi esclamar "la qu'armé" y, de siguío, a les 4:14, practicáron-y el test d'alcoholemia y dio 0,86 miligramos per llitru d'aire espirao y, cuarenta minutos dempués, n'otra prueba, dio inda más: 0,87 miligramos.

La Fiscalía caltién que'l vehículu del acusáu diba a una velocidá escesiva y inadecuada y ensin atender a les circunstancies de la circulación, invadió la carril contraria, provocando la muerte del conductor del vehículu escontra'l que chocó.

La Fiscalía considera que los fechos son constitutivos d'un delitu de conducción temeraria y d’un delitu de conducción so la influencia de bébora alcohólico y d’un delitu d'homicidiu por imprudencia grave.