El mundu conmemora'l Día Internacional de les Persones Mayores

Cruz Roja Xixón atendió a 12.000 mayores de 65 años nel estáu d'alarma

El mundu conmemora güei'l 30º aniversariu del Día Internacional de les Persones Mayores. Failo  mientres lluchamos col impactu que la pandemia ta teniendo nesti colectivu, non solo no tocante a la so salú, sinón tamién a los sos derechos y el so bienestar.

Anguaño'l númberu de persones de 60 años o más supera al de los neños menores de cinco años. Según Naciones Xuníes nes próximes tres décades, prevése que'l númberu de persones mayores en tol mundu seya'l doblu, llegando a más de 1.500 millones en 2050, y el 80% d'elles va vivir en países d'ingresos medios o baxos.

Más de 12.000 persones mayores de 65 años fueron atendíes en Xixón pola Cruz Roja nel estáu d'alarma. Son datos que la entidá presentó esta mañana por cuenta d'una xornada sobro persones mayores y confinamientu.