UXT pon como prioridá desaniciar los sueldos de menos de 1.000 euros

Na clausura de la Escuela de Branu

El secretariu xeneral d'UXT, Pepe Álvarez, defendió güei na Escuela de Branu que celebra'l so sindicatu n'Avilés un alcuerdu nacional que s'afite como prioridá que nun haya nengún conveniu colectivu n'España con trabayadores que reciban un salariu inferior a los 1.000 euros.

El líder d'UXT asegura que ye consciente de que la campaña, que denominaron "Ponte a mil", va costar tiempu, porque "va ser necesario sensibilizar a muncha xente, a munchos trabayadores pa que nun haya nengún conveniu per debaxo de los 1.000 euros".

Álvarez cree que nel cursu políticu qu'agora entama lleguen delles circunstancies que faen que seya'l momentu d'esixir un salariu mínimu de polo menos 1.000 euros, como ye'l fechu de qu'España tien un gobiernu con plenes competencies constitucionales, dempués del anterior periodu d'interinidá.

"Nesti momentu nun hai nenguna escusa para tocar los grandes problemes que tien esti país", declaró Álvarez, qu'amás cree que'l calter plural del actual Parlamentu "da más xuegu a les organizaciones sindicales y sociales de cara a poder intervenir".

Amás, el cursu políticu produzse "con un país que lleva en crecedera económica tres años y con perspectiva de que siga asina", por eso l'oxetivu d'UXT ye qu'heba un repartu de la bayura.

"Yo póngome coloráu de ver que tenemos un 24 por cientu más de persones mui riques nel nuesu país, que tenemos cuasi 600 persones más que son multimillonaries y que crecieron por mor de la situación de crisis que tamos viviendo", declaró'l dirixente sindical.

Pa consiguir esi repartu de la bayura, UXT ve nos presupuestos xenerales del Estáu una ferramienta eficaz y propón, "non yá que nun hai que rebaxar impuestos sinón tolo contrario, hai que tener más medios na axencia Tributaria pa erradicar el fraude fiscal, que s'asitia alredor del 25 por cientu n'España".

Amás, los presupuestos xenerales del Estáu tienen que revertir los retayos llevaos alantre en materia educativa, sanitaria y polítiques sociales, "sobre manera no que cinca a los paraos de llarga duración, con más de 55 años".

Ente los grandes retos, UXT asitia la potenciación de la industria, por ser el sector que xenera los emplegos meyor remuneraos y de mayor calidá.

Pa ello, UXT plantegó una subcomisión nel ámbitu parlamentariu, que Mariano Rajoy se comprometió a poner en marcha, coles mires de que xenere un ampliu consensu tresversal, políticu y social, pa procurar la potenciación de la industria.

Pepe Álvarez refirióse a la necesidá de poner fin al modelu que fai que seyan les empreses eléctriques les que marquen el pasu, porque les condiciones de calidá, de suministru y de preciu "han de ser les que'l país necesite".

Pa UXT, ye importante'l caltenimientu d'un mix enerxéticu nel que la estrella seya lo más llimpio, "ensin arrenunciar en nengún casu al carbón, porque ye una de les poques enerxíes estratéxiques que tien el país".

Pa esi repartu de la bayura del que fala Pepe Álvarez, tamién ye necesaria la negociación colectiva, "que desanició la reforma llaboral", y que va llegar al traviés d'un alcuerdu nacional xunto con CCOO, nel que yá se ta trabayando pa forzar esos mínimos salariales.

Amás, UXT va proponer nel nuevu cursu políticu potenciar el contratu relevu a partir de los 61 años pa favorecer l'empléu xuvenil.