Anticorrupción señala a tres miembros del lnstitutu de les Comarques Mineres

Hai pruebes que confimaríen un contactu directu y siguío con José Antonio Postigo

La investigación de la operación Hulla señala a tres cargos del Institutu de Reestructuración de les Comarques Mineres pol so papel na concesión de la subvención al Montepío.

Los rexistros fechos nos últimos díes permitieron a los investigadores incautar correos electrónicos que, aseguren, amuesen qu'había un contactu directu y siguíu ente'l xefe d'infraestructures del Institutu de Reestructuración de les comarques mineres, Manuel Gómez Cano, y l'ex-asesor fiscal del Montepío. Una correspondencia y unes xuntes nes que tamién participaba José Antonio Postigo.

La investigación céntrase agora en saber si l'ex-xerente del Institutu, Carlos Fernández, conocía esos contactos. La Fiscalía pidió yá los correos electrónicos ente estos dos altos cargos de la entidá.

Na so querella, Anticorrupción da-y al xerente una "posición nuclear" na concesión directa de la subvención al Montepío. Considéralu responsable de los certificaos y modificaciones de la normativa que permitieron la construcción del xeriátricu.

Tamién señala nes sos pesquises al interventor del Institutu, al considerar que nun hebo comprobación material nin formal d'a qué se taba destinando la subvención.

La investigación tamién indaga nel papel que tenía la empresa nomada Posfer. Anticorrupción sospecha que, anque figura a nome del constructor y un sociu, detrás tamién taba Postigo. Esta empresa namái tuvo un ingresu, un contratu con Repsol, pa instalar el gas na Residencia. Contratu que taba condicionáu al proyectu de gasificación d'Ayer.

Nesti puntu, la Fiscalía diz que tien que ser oxetu d'investigación la participación que nos fechos pudo tener l'ex-alcalde Gabriel Pérez Villalta.