Asturies ye la segunda comunidá con mayor éxitu en Bachilleratu

La principal falta del Principáu ye la escolarización de cero a tres años

Asturies ye la segunda comunidá española onde más estudiantes completen con éxitu’l Bachilleratu. Ye una de les conclusiones del informe sobre l’estáu y la situación del sistema educativu asturianu, nos 391 centros públicos, 70 concertaos y 31 privaos ensin conciertu del Principáu.

La nuestra comunidá presenta’l porcentaxe más baxu d’estudiantes, de población escolarizable, al respective del restu del país. El gastu públicu, por alumnu, tanto na rede pública como na concertada, ye’l cuartu meyor nel total de toles comunidaes.

En cuantes a la tasa d’abandonu tempranu, Asturies ta nel 12%, en parámetros munchu meyores que la media española, que ye la peor media d’Europa, rondando’l 18% nel conxuntu del país, cuando l’oxetivu de la Xunión pa 2020 ye rebaxar esa tasa d’abandonu al 10%.

Na titulación nes diferentes etapes educatives, Asturies algama meyores resultaos que la media española. La principal falta nel Principáu al respective de los desafíos marcaos por Europa ye la escolarización na etapa de 0-3, onde a pesar de tener menos neños que n’otres comunidaes, hai menor cobertura que n’otres autonomíes.

La Conseyería insiste en qu’unu de los sos oxetivos pa esta llexislatura ye meyorar la ufierta educativa nel segmentu de cero a tres años.