Asturies podrá siguir faciendo controles de población del llobu

Morán defende que les esplotaciones que convivan con grandes carnívoros tengan mayor reconocencia

Asturies podrá siguir faciendo controles de población de llobu como fai agora. L’informe del comité científicu qu’inxerta’l proyectu d’orde ministerial pa inxerir a toles poblaciones de llobu nel Llistáu d’Especies Silvestres en Réxime de Protección Especial afita como unu de los instrumentos posibles de xestión ye’l del so control poblacional.

Asina lo aseguró’l secretariu d’Estáu de Mediu Ambiente, Hugo Morán nuna entrevista a TPA Noticies Matinal. El requisitu obligatoriu ye que’l control lo faga l’alministración como yá pasa n’Asturies y non al traviés d’actividá cinexética y deportiva, como n’otres comunidaes al norte del Duero.

L’oxetivu, esplica Morán, ye tener un estatus de xestión del llobu igual en tola península ibérica que nos iguale tamién a la Xunión Europea. El modelu actual tien que superase porque’l compromisu ye, asegura, acompañar na gobernanza y financiación.

La nueva estratexa, amás, tien que reconocer l’esfuerzu de los ganaderos nel caltenimientu de la biodiversidá.

Un procedimientu alministrativu y un mecanismu d’evaluación únicu pa toles comunidaes, explica, qu’acabará colos agravios nes cuantíes a recibir o nel tiempu d’espera na concesión d’ayudes polos estrozos del llobu.