Asturies va acometer con urxencia la restauración de les zones afectaes poles quemes

Va apurrir fondos estres pa repoblar y ayudar a los afectaos

El Gobiernu asturianu va acometer con urxencia la restauración de les zones más fráxiles que se vieren afectaes poles últimes quemes, va apurrir fondos estraordinarios p'ayudes a los afectaos y va adelantar actuaciones previstes nel Plan del Suroccidente, contorna pa la que plantega tamién facer un plan específicu que frene grandes fueos.

Según la conseyera de Desarrollu Rural y Recursos Naturales, el Principáu va pidir sofitu al Estáu y la Xunión Europea p'acometer la restauración de los montes públicos quemaos entamando poles zones que presenten mayor riesgu d'erosión pa evitar la perda de suelu fértil, "actuaciones que son mui costoses".

Álvarez fixo esti anunciu tres la xunta que caltuvo xunto al conseyeru de Presidencia, Guillermo Martínez, colos alcaldes del suroccidente asturianu, la contorna más afectada poles quemes que desanició cientos d'hectárees nos últimos díes.

Les xeres de restauración tienen que facese "con toa urxencia" afirmó la conseyera, en conseñando que fueron "millones d'árboles" los que se vieron afectaos poles últimes quemes que, amás, destruyeron infraestructures ganaderes, como mangues y zarros.

La titular de Desarrollu Rural comprometióse a reponer eses infraestructures nos montes d'utilidá pública y a facilitar ayudes a los particulares, a los que tamién van dar subvenciones del cien por cien pa la repoblación de los montes quemaos.
Pel momentu, la Conseyería ta recibiendo la valoración de daños de los particulares, y Álvarez comprometióse a actuar con urxencia a la hora de tratar de desaniciar les perdes de los particulares y adelantó la posibilidá d'apurrir fondos escepcionales p'ayudar a los que nun tean aseguraos.

El conseyeru de Presidencia, pela so parte, adelantó que'l vienres yá pidió al Ministeriu d'Interior que flexibilicen los criterios pa poder optar a les ayudes permanentes en materia de protección civil, que son les equivalentes a les qu'enantes diben asociaes a la declaración de zona catastrófica.

Xunto con Galicia y Castiella y Lleón pidieron tamién al Executivu central que plantegue a la XE qu'amenorgue les esixencies necesaries p'aportar a los nomaos fondos de solidaridá europeos pa que puean beneficiase les zones afectaes poles últimes quemes.

Nel ámbitu autonómicu, el voceru del Gobiernu aseguró que se va facer un "esfuerzu importante" p'adelantar les obres del Plan del Suroccidente, nel que s'incluyen inversiones por 9,2 millones en prevención y estinción de quemes ente 2015 y 2025.

Martínez reconoció qu'entá ye bien llueu pa saber cuántes hectárees se vieron afectaes pol fueu o cuántes quemes fueron intencionales, pero señaló qu'hai que tener en cuenta que de les 27 quemes investigaes nesta contorna en 2016, 24 fueron intencionales, lo que supón el 89 por cientu del total.