Asturies va pidir midíes cautelares frente a la catalogación del llobu ibéricu

Calvo considera que l'asoleyamientu de la orde ministerial provoca una situación d'inseguridá xurídica

El Gobiernu del Principáu va interponer un recursu contencioso-alministrativu escontra la orde ministerial d'inclusión del llobu ibéricu nel Llistáu d'Especies Monteses en Réxime de Protección Especial (Lespre) y va pidir midíes cautelares pa suspender la eficacia de la norma na tramitación del procedimientu.

Asina lo treslladó esti vienres el conseyeru de Mediu Rural y Cohesión Territorial, Alejandro Calvo, al Conseyu de Gobiernu del Principáu, que considera que l'asoleyamientu de la orde ministerial el pasáu martes provocó una situación d'inseguridá xurídica nel modelu de xestión d'esta especie n'Asturies, yá que'l cambéu na calificación d'esti cánidu afecta al II Plan de Xestión del Llobu, anguaño a valir.

El Gobiernu del Principáu defende l'actual sistema de xestión de la especie, incluyíos los controles poblacionales que trai, y reclama que puean facese "con total seguridá xurídica cuando resulten necesarios".