Barbón asegura que'l Gobiernu va desbloquear en nada los fondos que debe a les autonomíes

Homenaxe del PSOE a les víctimes d'El Pozu Funeres

El presidente del Principáu y secretariu xeneral de la FSA-PSOE, Adrián Barbón, responsabilizó esti sábadu a Podemos y Ciudadanos de la repetición electoral y alvirtió al líder de la formación morada, Pablo Iglesias, de que nun se pue negociar un gobiernu de coalición "a base de bofetaes".

Barbón fizo estes afirmaciones nel tradicional homenaxe del PSOE a les ventidós persones tiraes vives en 1948 poles brigaes franquistes al fondu d'El Pozu Funeres, una fuexa natural allugada en Peñamayor, nel conceyu de Llaviana.

Pal dirixente socialista asturianu, los socialistes nun queríen unes nueves elecciones y intentaron "por tolos medios" que nun les hubiera polo qu'aseguró entender "la frustración" de los votantes a los que volvió pidir perdón pero señalando como responsables de la situación a Podemos y Ciudadanos.

Asina, avanzó, el PSOE va salir "a ganar" los próximos comicios y va apelar a los hasta agora votantes de Podemos y de Ciudadanos pa que concentren el votu nes candidatures socialistes "non por interés partidista sinón pola estabilidá del país".

Según Barbón, cada día que pasa ensin un Gobiernu estable ye "perxudicial" p'Asturies yá que l'Executivu en funciones ta intentando, pese a la so situación, encarar temes como'l pagu de los anticipos a cuenta que se deben a les comunidaes autónomes y buscar "un resquiciu llegal" pa lliberar esos fondos.