Bual llucha por siguir vivu dempués de sieglos d’esplendor

La historia antigua del conceyu nun se pue entender ensin conocer Cova do Demo, el Castro de Pendia o los túmulos de Penouta

La historia más antigua del conceyu de Bual nun se podría entender ensin visitar llugares como Cova do Demo, yacimientu únicu de la edá del bronce, una cueva de 15 metros de profundidá con arte rupestre, el Castro de Pendia, un enigmáticu pobláu prerromanu con una llinia urbana especial, poques cases, pero muries de defensa mui grandes, o los túmulos de Penouta, los elementos de mayor antigüedá documentaos nel conceyu y la evidencia d’una arquitectura funeraria nel Neolíticu.

Ye lo que sabemos del Bual más antiguu, pero buscando na so historia tenemos que dir a va 200 años. Fai dos sieglos entamó a formase la realidá que vemos enagora. Ente 1837 y 1840 llevántase la ilesia, l’ayuntamientu o la cárcel, qu’hasta entós taba n’Armal.

La historia del conceyu fala tamién de feches tráxiques, como 1879, cuando una epidemia de viruela causa la muerte de más de 200 vecinos. Por estos años vivíen en Bual 6.800 persones. Yeren años de crisis y munchos deciden emigrar, sobre manera a Cuba o L’Arxentina. Dempués de la guerra del 98 tornen y llega l’esplendor al conceyu. Los emigrantes vuelven con dineru y nótase nes edificaciones.

Nestos años la xubida demográfica ye mui grande. Nesa década había cuasi 7.400 habitantes, el sector comercial y hosteleru repunten, el dineru sigue llegando con fuerza de los emigrantes cubanos y les esplotaciones mineres tán nel so esplendor.

Vivir en Bual nos años 50 y 60 yera respirar felicidá. L’ambiente d’alegría notábase en romeríes como la celebrada en La Bobia y en fiestes como San Cristóbal. Pero too ello nun tardaría n’acabase y ye que’l grifu de la emigración zárrase y la minería acábase.

Güei en Bual malapenes se supera la cifra de los 1.500 habitantes. Nun sieglu’l conceyu perdió cerca de 5.000 vecinos. La despoblación nun ye, poro, ayena a un conceyu que llucha por siguir vivu en plena cuenca d’El Ríu Navia.