Cercu sobre Villa y Postigo polos fondos de la residencia de Felechosa

L'ex-presidente del Montepío, el constructor, arquitectu y asesor fiscal deteníos

La denomada 'Operación Hulla' qu'investiga'l supuestu usu fraudulentu de fondos y subvenciones del Montepío de la Minería pa la construcción del xeriátricu de Felechosa sigue abierta a estes hores.

La Guardia Civil tuvo tola mañana na casa particular del ex-líder sindical, José Ángel Fernández Villa. Fueron más de cinco hores les qu'axentes de la Unidá Central Operativa de la Guardia Civil tuvieron nella.

A la salida llevaben caxes y munchu material. La so abogada, qu'entró y salió de la casa delles vegaes nun quixo falar, aunque trescendió que'l so defendíu foi citáu a declarar.

Pela so parte, el que fuera estrechu collaborador del ex-líder del SOMA-UXT, José Antonio Postigo (ex-presidente del Montepío de la Minería) sí ta ente los deteníos. Axentes de la Guardia Civil de Murcia pridáronlu.

L'ex-asesor económicu d'esta mutualidá minera, José Manuel Fernández, tamién salió prindáu del so despachu na cai Inxenieru Marquina d'Uviéu pasaes les 18:30 hores. El rexistru, nel que tuvo presente, duró cuasi 10 hores.

Otru de los deteníos ye Juan Antonio Fernández, alministrador de la empresa 'Alcedo de los Caballeros', constructora de la Residencia de Mayores 'La Minería' de Felechosa. Axentes de la Unidá Operativa de la Guardia Civil llegaron pasaes les 14:30 hores a les sos instalaciones nel polígonu d'El Masgaín, en L.lena.

Ente los deteníos ta tamién l'arquitectu y autor del proyectu de construcción de 'La Minería', Manuel Sastre.

La operación denomada 'Hulla' fízose al empar n'Asturies, Valladolid, Madrid y Murcia y supunxo rexistros y requerimientos en dellos organismos públicos y privaos.