Decepción nel ámbitu empresarial pol cambéu nel proyectu del vial de Xove

El Principáu, "alliniáu dafechu" col Conceyu de Xixón sobro'l vial de Xove

De tomadura de pelo catalógase dende l'ámbitu empresarial asturianu la renuncia del Ministeriu de Tresportes al proyectu del túnel del vial de Xove. Témese que seya una escusa más pa retrasar un proyectu vital pal desenvolvimientu económicu de l'actividá portuaria n'El Musel.

Na Cámara de Comerciu de Xixón, l'anunciu del Ministeriu provocó una fonda impresión y non pa bien. Construyir el vial en superficie nun soluciona nengún problema y xenera otros nuevos, asegura Félix Baragaño, presidente de la Cámara de Comerciu de Xixón. La entidá cameral tamién cuestiona los estudios técnicos que motiven esta decisión.

Una decepción más en materia d'infraestructures, apunta María Calvo, presidenta de FADE.

La patronal asturiana del tresporte teme que se trate d'una escusa pa xustificar un nuevu retrasu, esplica Ovidio de la Roza, presidente d'Asetra.

N'Asetra esmolez la incertidume que podría xenerar la prórroga de los Presupuestos xenerales del estáu pal proyectu.

Dende'l Colexu de Caminos piden tiempu p'analizar la nueva propuesta del ministeriu del vial de Xove. Los inxenieros aseguren que'l refugáu falsu túnel técnicamente ye abordable y apunten a otru tipu de causes pal cambéu de postura.

Vidal Gago, decanu de la Demarcación d'Asturies del Colexu d'Inxenieros de Caminos, Canales y Puertos, alvierte de que proyectos d'esta envergadura tienen que partir d'un proyectu meyor dotáu económicamente.
El PSOE de Xixón ve "inadmitible" l'últimu cambéu nel proyectu del vial de Xove

El secretariu xeneral de l'Agrupación Socialista de Xixón, Monchu García, afirmó esti xueves que na so formación siéntense “frustraos" y "decepcionaos" tres el postrer y "inalmitible" cambéu nel proyectu del vial de Xove.

García indicó que "nun ye de recibu" que 30 años dempués se ponga enriba de la mesa una solución que "yá se refugó" nel so momentu.

El secretariu xeneral de l'Agrupación Socialista de Xixón afitó que'l sentir de la ciudadanía ye d'una "frustración enorme" al volver "al puntu de partida".

El Principáu, “alliniáu dafechu" col Conceyu de Xixón sobro'l vial de Xove

El presidente del Principáu, Adrián Barbón, aseguró esti xueves que'l so gobiernu va caltenese “alliniáu dafechu" col Conceyu de Xixón en relación al futuru proyectu del vial de Xove tres la frustración xenerada pol anunciu del Ministeriu de Tresportes del aplazamientu de la obra y de la imposibilidá de construyir el túnel previstu.

Na visita que fizo a San Xuan de Beleño pa conocer, cola ministra d'Educación, Pilar Alegría, la futura rede autonómica d'escueles infantiles, Barbón agradeció la sinceridá del secretariu d'Estáu de Tresportes, José Antonio Santano, al refugar el proyectu inicial pol riesgu que podría suponer la construcción del túnel proyectáu pa 150 viviendes y pa un xeriátricu.

Sicasí, reclamó del Ministeriu que facilite al Principáu tolos informes que llevaron a adoptar esa decisión y qu'alvertíen amás que'l túnel previstu nun diba dexar la salida de dellos materiales del cai d'El Musel, que tendríen que siguir saliendo en superficie, colo que se caltendríen los perxuicios pa los vecinos de la zona oeste de Xixón.