Degaña algamó caltener una población estable nel sieglu XX

La mayor mengua del númberu d’habitantes dase nes dos últimes décades

Anque les mayores cifres de población llegaben a entamos del sieglu XX, superando los 1.900 vecinos, gracies a la minería, Degaña caltuvo’l númberu d’habitantes más o menos estable tola centuria.

El principal cambéu foi na distribución de la población y mientres menguaba’l númberu d’habitantes na capital del conceyu, en Degaña, medra la villa de Zarréu venceyada a la minería.

Benilde Ramos, a piques de cumplir los 90, foi testigu de tolos cambeos con dellos negocios en Zarréu na so vida. Zarréu perdió’l calter rural y ganó un perfil semiurbanu, con funciones comerciales y de servicios.

Ficiéronse poblaos mineros, de mano’l de Las Colominas, nel centru’l pueblu y yá nos años 70 el de Los Tachos, pegáu a la esplotación minera, pero’l de la vivienda siempres foi un problema pa los trabayadores que llegaben de fuera.

Venceyada a l’actividá minera y al trabayu, Degaña caltúvose amás como ún de los conceyos con población más mozo. Nel 2001, entá yera’l conceyu asturianu con menor índiz d’avieyamientu.

La crisis minera provocó que, dende los 2000, entamare un rápidu declive poblacional hasta que, nel 2017, baxa per primer vegada de los 1.000 habitantes. Zarren servicios, negocios y viviendes.

Los últimos datos oficiales cifren en 921 los vecinos del conceyu. La villa de Zarréu sigue siendo la de mayor población, con 329 habitantes, siguida de la capital, Degaña, con 167. El restu espárdense ente los pueblos d’El Rebol.lal y Fonduveigas, tamién na parroquia de Degaña, y Trabáu, yá na llende col conceyu d’Ibias. Nengún d’ellos supera’l mediu centenar de vecinos.​