Desestimada la demanda de la familia d’Eloy Palacio escontra l’Ayuntamientu

La xueza considera probáu que cometió una clara imprudencia temeraria

El xulgáu de lo social d’Uviéu refugó la indemnización que la familia del bomberu Eloy Palacio esixía al ayuntamientu d’Uviéu y la so compañía aseguradora pola quema d’Uría. La xueza considera probáu que’l bomberu fináu cometió una clara imprudencia temeraria.

Na sentencia recuéyese que nin Palacio nin el so compañeru mancáu recibieron otra orden que nun fuere la d’atacar la quema dende fuera y refrescar los edificios apegaos pa evitar la propagación del fueu. A pesar d’ello, decidieron salir de la cesta, un comportamientu nel que la xueza ve una desobediencia a la instrucción de los sos mandos.

La xueza nun ve que l’ayuntamientu vulnerare nenguna midida de seguridá. L’ayuntamientu ufiertó una indemnización de 397.000 euros que foi refugada pola familia qu’agora recibirá los 18.000 euros colos que l’ayuntamientu indemniza a los sos trabayadores que finen nel so puestu de trabayu.