El Conceyu d'Uviéu reasitia al ex-xefe de la Policía Local

José Manuel López incorporaráse a la dirección de la División Operativa

L'ex-xefe de la Policía Local d'Uviéu, José Manuel López, incorporóse a la dirección de la División Operativa, tres la so destitución el pasáu vienres.

Ye'l puestu que ocupaba'l que va ser el so socesor como máximu responsable del cuerpu, Luis Manuel García Pena, quien tamién asumió yá los sos nuevos llabores.

Dambos comisarios coincidieron esta mañana nes instalaciones de Rubín. José Manuel López va encargase d'equí p'alantre de coordinar calendarios llaborales, horarios y turnos de los grupos del 092, los operativos de tráficu, atestaos y los servicios nocherniegos de Seguridá Ciudadana.

La so reticencia a que los nuevos axentes que s'incorporaben al Cuerpu completaren la so instrucción na Escuela de Formación del Principáu foi, xuntu cola so implicación na Operación Enredadera, unu de los fechos que desencadenó'l cese.

El so relevu como Comisariu Xefe va ser temporal, hasta que s'abra un nuevu procedimientu p'asignar esta plaza.

Fontes municipales aseguren que'l nomamientu definitivu del nuevu xefe de la Policía va tar supeditáu al desarrollu de les investigaciones de la UDEF. Asina como les midíes adicionales que puean tomase escontra los mandos policiales investigaos.