El Gobiernu d'España comprométese a buscar un inversor p'Alcoa

Alcoa y sindicatos alcuerden invertir 20 millones d'euros en cada planta y caltener l'empléu hasta xunetu

El Gobiernu comprométese a buscar un inversor p'Alcoa, tres l'alcuerdu algamáu ente la empresa y sindicatos pa invertir 20 millones d'euros pa la meyora de les instalaciones en cada planta y caltener l'empléu hasta xunu.

El Gobiernu central amosóse optimista y con "mires razonables" sobre que la crisis d'Alcoa tenga "poca afectación final" sobre l'empléu, anque conseñó que "los resultaos" nun dependen del Executivu y que la garantía de salvar el 100 % de los empleos nun ta incluyida nel prealcuerdu.

Nuna rueda de prensa, tanto la secretaria d'Estáu d'Empléu, Yolanda Valdeolivas, como'l secretariu xeneral d'Industria, Raúl Blanco, valoraron "mui positivamente" el prealcuerdu, "impensable" y "inimaxinable" fai unes selmanes, según les sos palabres.

Dambos espresaron el compromisu plenu de Gobiernu central, comunidaes autónomes y alministraciones locales na busca de soluciones integrales pa les dos plantes, lo que pasa pola busca activa d'un inversor, l'atracción de proyectos industriales y el caltenimientu del máximu de puestos de trabayu

"Tamos mui satisfechos col prelcuerdu que nos asitia nun horizonte que yera inimaxinable va unos díes", dixo Valdeolivas, que reconoció que queda "munchu trabayu" por facer nestos seis meses.

Tamién destacó qu'hasta xunu los trabayadores que nun tienen el so emplegu garantizáu van participar en cursos de formación profesional, lo que va ameyorar la so empleabilidá, y confió en qu'eso contribuya tamién a menguar l'impactu.

Dixo qu'esos seis meses dan un marxe de maniobra y tiempu abondu p'atopar soluciones, pero conseñó que'l resultáu nun depende del ministeriu.

Blanco reveló qu'hai contactos en marcha con posibles inversores por parte de les tres alministraciones y consideró que'l prealcuerdu dexa "un marcu meyor" pa facilitar esa xera.