El Gobiernu del Principáu pide esplicaciones a Iberdrola pol cierre de la térmica de Lada

L'Executivu defende una transición enerxética equilibrada

El Gobiernu del Principáu exixó esplicaciones a Iberdrola pol cierre de la térmica de Lada.

El Principáu nun comparte nin el fondu nin les formes coles que la compañía anunció'l cierre de la térmica de la central.

L'Executivu defende una transición enerxética equilibrada y considera precipitada la decisión de la empresa.

Pela so parte, el coordinador xeneral d'IX Asturies, Ramón Argüelles, espresó'l so rechazu al cierre de la central d'Iberdrola en Lada y exixó un "compromisu claru" pa la reindustrialización de les comarques mineres, asina como "un modelu enerxéticu nacional sofitáu nes necesidaes del país y non nos intereses de les eléctriques".

Nun comunicáu, Argüelles alvirtió que'l cierre de Lada tendrá un "impactu negativu pal empléu nel futuru, por más que se garantice la recolocación de la plantiya".

"Exiximos al Gobiernu del Estáu y tamién al d'Asturies un plan inmediatu pa la industrialización de les comarques mineres, dando respuesta a los alcuerdos incumplíos y con carga presupuestaria pa 2018", dixo'l máximu responsable d'IX d'Asturies.

Argüelles defendió que'l modelu enerxéticu tien que plantegase "teniendo en cuenta a les poblaciones que se vayan a ver afectaes pola so puesta en marcha, garantizando, en cualquier casu, la seguridá enerxética ensin renunciar, mientres se queme carbón, al usu del mineral autóctono" que "tien que formar parte de la reserva estratéxica nacional".

Mientres tanto, el diputáu nacional de Foro, Isidro Martínez Oblanca, anunció una iniciativa parlamentaria urxente pa que'l Gobiernu evite'l cierre de les térmiques y negocie un nuevu Plan del Carbón.

Martínez Oblanca, que defendió'l futuru del carbón autóctono "como factor clave pa la soberanía enerxética española", instará al Executivu rexonal a "oponese firmemente" a la solicitú d'Iberdrola pa cerrar la central de Lada, que "conllevaría al ermu industrial de tola Cuenca del Nalón".

Según dixo'l parlamentariu de Foro, "taba cantao que la iniciativa de Podemos escontra'l carbón, sofitada por PSOE, C's y IX, diba a acelerar el proyectu d'Almunia y de Zapatero en 2010 pa cerrar les mines y les térmiques, y desertizar les cuenques mineres".

"Los socialistes lleven años acreitando en Madrid y en Bruxeles que son los grandes enemigos del carbón, anque llueu presumen n'Asturies de boca de tolo contrario", denunció Martínez Oblanca.