El PSOE denuncia "escesos y mentires" del PP pa xustificar el so refugu a los presupuestos

Pumares afirma que Foro "llenda a esgaya" la influencia d'IX pa medrar la presión fiscal

El portavoz axuntu del Grupu Socialista na Xunta Xeneral, Luis Ramón Fernández Huerga, denunció güei la "táctica del calamar" y la campaña de "escuses, cuando non mentires", qu’usa'l Partido Popular pa xustificar la so falta de sofitu a los presupuestos del Principáu pal añu viniente, que xube a más de 6.348 millones d'euros.

Nel últimu día pa que los grupos parllamentarios rexistren enmiendes de totalidá a les cuentes autonómiques feches pol Gobiernu d'Adrián Barbón, Fernández Huerga aseguró que los populares "rayen lo grotesco" con unes crítiques a los presupuestos "caracterizaes pola falta d'argumentos".

Como exemplu, señaló que dicen qu'hai una xubida d'impuestos, que nun se da nesti proyectu de llei, pero tampoco en tola llexislatura pasada; qu'hai 20 millones d'euros venceyaos al turismu que nun s'executaron, cuando los tán recibiendo los ayuntamientos, incluyíos los gobernaos pol PP, o que nun hai partíes afitaes pa la estación ivernal de Payares, cuando hai 750.000 euros.