El Principáu cierra hostelería, ociu, compres y la Universidá per 15 díes

Nun se podrá tar na cai más allá de les 22:00 sacante por razones xustificaes

La hostelería, l'ociu, les actividaes, espectáculos y acontecimientos deportivos y culturales, y les compres en grandes superficies y munchos pequeños comercios van vese llendaes nos próximos 15 díes en tol Principáu pa intentar menguar la tresmisión del coronavirus, que dende l'entamu de la pandemia llevó yá 490 vides, y poder baxar la presión hospitalaria.

Les restricciones anunciaes ayeri pol presidente del Principáu, Adrián Barbón, col fin de llendar los movimientos y les interacciones personales, fueron asoleyaes a les 18:00 de güei nel Boletín Oficial del Principáu y van tar a valir dende les 00:00 de mañana, 4 de payares, y la medianueche del 18 de payares, ensin perxuiciu de les prórrogues que pudieren aplicase si la situación epidemiolóxica lo aconseya.

Un segundu resolvimientu, qu'alvierte qu'Asturies ta "nuna situación de tresmisión comuñal sostenida, de mal control, y con una presión creciente nel sistema sanitariu", adelanta dos hores el toque de queda en tol Principáu, colo qu'a partir de mañana nun se podrá tar na cai más allá de les 22:00 hores sacante por razones xustificaes.