El Principáu pidirá que se devuelva hasta l'últimu euru defraudáu

Valoración de Guillermo Martínez al fallu del casu Renedo

El voceru del Gobiernu d'Asturies, Guillermo Martínez, afirmó güei que l'alministración rexonal pidirá que los condergaos pol casu Renedo "devuelvan hasta l'últimu euru defraudáu" al Principáu.

En rueda de prensa, el conseyeru de Presidencia y Participación Ciudadana valoró'l fallu del casu Renedo conocíu ayeri, qu'impón 40 años y tres meses de cárcel a ocho de los trece procesaos, ente ellos l'ex-conseyeru d'Educación José Luis Iglesias Riopedre.

Recalcó que la sentencia señala qu'esti casu nun se trata de qu'hubiere "una trama" d'un partíu políticu y que la "corrupción tien castigu".

Martínez señaló que'l Gobiernu esperará hasta que se faga la llectura de la sentencia, prevista pal viniente xueves, pa cifrar el total de les cantidaes que pidirá'l Principáu pa compensar los daños recibíos, que "nun sedrá menos de cinco millones d'euros", según solliñó.

Cifró "como mínimu" 2,3 millones d'euros el dineru que s'esixirá a la ex-funcionaria Marta Renedo, una cantidá asemeyada a la que demandará a la ex'directora xeneral de Planificación de la Conseyería d'Educación María Jesús Otero, "un total como mínimu de 2,5 millones d'euros".

El conseyeru afirmó que los empresarios condergaos tendrán qu'indemnizar de manera solidaria'l perxuiciu causáu al Principáu, que dirá cuantificáu, según apuntó, poles obres non feches, el mobiliariu abonáu y non dau y inclusive'l material dau y pagáu a un preciu mayor al que nun correspondía.

Al rodiu de Riopedre, Martínez dixo qu'habrá qu'esperar a saber la sentencia pa conocer la cuantía que se-y reclamará y recordó qu'hai una vista nel Tribunal de Cuentes na que'l Principáu tamién reclama cantidaes económiques na que ta implicáu l'ex-conseyeru.

Martínez resaltó que l'alministración que dirixía l'ex-presidente Vicente Álvarez Areces foi la que, en 2010, denunció esti casu énte la Policía Nacional y la Fiscalía, con "una collaboración dafechu cola xusticia dende l'entamu".

El voceru del Gobiernu aseguró que nos últimos años meyoraron los controles de la corrupción y instó a los demás grupos parllamentarios a consensuar un testu pa la futura Llei de Tresparencia y Bon Gobiernu.

Criticó la diferente manera de midir los casos de corrupción ente los diferentes partíos, mientres el de so, el PSOE, siempre tuvo "firme énte estos temes, col mesmu grau d'intolerancia, aplicando'l so códigu éticu énte cualquier tipu de sospecha" dientro de la so formación.

En concreto, dixo que-y paez "un auténticu sarcasmu qu'un partíu de corrupción sistémica faga dalguna declaración como la que fizo ayeri", lo que, a xuiciu de so, amuesa un estáu de "desesperación" énte la corrupción.